Mbledhjen e Këshillit të Sigurisë Kombëtare, mbi çështjen “Balili”, duket se kreu i shtetit më shumë e ka shfrytëzuar si ‘tribunë’ për të artikuluar qëndrimin e tij kundër qeverisë. Në deklarimet e kreut të shtetit, dukshëm politike, ka një sërë akuzash ndaj qeverisë ku ajo që bie në sy është artikulmi “për mungesën e deri më tanishme të rezultateve konkrete në luftën kundër krimit, trafikut të narkotikëve, pastrimin e parave”. Mjafton vetëm kjo frazë për të kuptuar se mbledhja në fjalë ka qenë më shumë një përpjekje e kreut të shtetit për të spikatur me akuza politike. E si për mos mjaftuar kjo, Nishani ka vijuar edhe më tej duke u shprehur se këto kanë “ndikuar edhe në imazhin e shtetit shqiptar”. Për të justifikuar edhe thirrjen e kësaj mbledhje, e cila është vlerësuar gjerësisht se bie ndesh me Kushtetutën, kreu i shtetit në fjalën e tij të publikuar nga zyra e tij e shtytpit, ka nënvizuar se “Balili” cënon sigurinë kombëtare.
“Vetë faktin që edhe partnerët tanë dhe agjencitë ndërkombëtare ligjzbatuese janë interesuar për zgjidhjen sa më të shpejtë të saj dhe kanë shprehur shqetësimin disa herë, ilustron përmasat e mëdha që ajo mbart jo vetëm duke cenuar sigurinë tonë kombëtare duke kapërcyer edhe kufijtë e vendit tone”, ka deklaruar Nishani.
Sipas tij, çështja ‘Balili’, përtej nivelit kombëtar i tejkalon përmasat individuale të rastit në fjalë, sepse ajo është shtrirë dhe ka marrë përmasa të zgjeruara gjeografike në disa shtete fqinje dhe aleate dhe për këto arsye, mbledhja e sotme u thirr pikërisht për të diskutuar, përcaktuar dhe këshilluar mbi hapat e marrë, ndjekjen dhe vijueshmërinë e veprimtarive institucionale të agjencive ligjzbatuese lidhur me hetimin e mëtejshëm të saj.
Ndërsa kryetari i Kuvendit Ilir Meta në diskutimin e tij, e argumentoi kërkesën drejtuar Presidentit për të thirrur mbledhjen e Këshillit të Sigurimit Kombëtar me faktin se rasti konkret përbën jo vetëm një shqetësim të madh publik me ndjeshmëri të lartë, por ai ka tërhequr edhe vëmendjen e aleatëve dhe partnerëve tanë strategjikë në veçanti të Shteteve të Bashkuara të Amerikës, si dhe agjencive ndërkombëtare ligjzbatuesve, duke ngritur pikëpyetje për seriozitetin e institucioneve shqiptare në luftën kundër krimit të organizuar dhe fenomenit të trafikimit të drogës, duke dëmtuar njëkohësisht edhe imazhin e vendit tonë.
ma.me
