Kryetarja e Komisionit Qëndror të Zgjedhjeve, Lefterie Luzi ka thënë se çështja e Vorës është e mbyllur.
Në një konferencë për mediat, ajo tha se në Vorë ka mbaruar procesi i numërimit si dhe është shpallur kandidati fitues.
Sipas saj rreth 1 e 800 mijë shqiptarë votuan në zgjedhjet e 21 qershorit, ose rreth 48 përqind e personave më të drejtë vote.
Luzi tha se procesi ka vijuar normalisht, me përjashtim të disa zvarritjeve në numërim, sidomos në KZAZ-në numër 1, që përkon me Malësinë e Madhe, ku rezultati për kryetarin e bashkisë ishte i fundit që u shpall.
Kryetarja e KQZ-së tha se është drejt përfundimit edhe procesi i numërimit të kutive për këshillat bashkiakë. 167 kuti kanë mbetur për t’u numëruar deri më tani, ndaj pritet që për çështje orësh të mbyllet i gjithë procesi.
