Ndërsa Donad Trump po akuzohet se nuk dënon hapur të djathtën ekstreme dhe grupet raciste, kryestrategu i Shtëpisë së Bardhë, Steve Bannon i cilësoi nacionalistët e bardhë si një grup kllounësh.
Bannon konsiderohet si truri pas axhendës nacionaliste të Presidentit, por në intervistën e rrallë për gazetën “The American Prospect”, ai tha se mbështet nacionalizmin ekonomik për të luftuar efektet negative të globalizimit, ndërsa shtoi se, sipas tij, etno-nacionalistët si ata të Virxhinias janë një grup kllounësh që duhet shtypur.
Intervista e Bannon vjen ndërsa ka dyshime për të ardhmen e tij, pasi vetë Trump i pyetur nga mediat tha se kjo mbetet për tu parë. Trump po kritikohet ashpër pasi fajësoi të dyja palët për dhunën në Virxhinia, duke barazuar racistët e nazistët me amerikanët që dolën për t’i kundërshtuar, por Bannon ishte shumë i qartë në këtë pikë. Bannon tha se nacionalistët e bardhë janë fare të parëndësishëm, por përfitojnë sepse marrin shumë vëmendje nga mediat.
Bannon kundërshtoi hapur shefin e tij edhe për Korenë e Veriut, duke thënë se ky konflikt nuk mund të zgjidhet ushtarakisht, pavarësisht komenteve të Trump për “zjarr dhe furi”. Bannon tha se në 30 minutat e para të luftës hipotetike, Koreja e Veriut mund të vrasë me armë të zakonshme 10 milionë jugkoreanë që jetonë në Seul, vetëm 50 km larg kufirit.
Prandaj, pa u zgjidhur ky problem, nuk ka zgjidhje ushtarake dhe Koreja e Veriut ka avantazhin.
a.ç
