Nga Armando Meta/
Debatet dhe sherret deri në nivele joserioze në mbledhjen e fundit të kryesisë së PD-së, kanë nxjerrë në pah një fakt tronditës dhe mjaft domethënës: atë të mungesës reale të përfaqësimit elitar në këtë institucion mjaft të rëndësishëm politik. Pa pasur nevojë të analizohen emër për emër anëtarët e kryesis së PD-së, duke përdorur një sistem krahasimor të nivelit intelektual dhe profesional të kësaj force politike, që nga themelimi i saj e deri në ditët e stome, vë re lehtësisht se ky nivel është në rënie të lirë. Fenomeni i thjeshtëzimit deri në banalitet i elitës në nivelet e larta të instiutucioneve partiake, nuk është vetëm një virus që ka prekur PD-në, por edhe forca të tjera me peshë në jetën politike të vendit. Por në PD shquhet më qartazi thjeshtëzimi i nivelit elitar sa i përket vlerave intelektuale, akademike dhe profesionale. Eshtë e vërtetë që Berisha ndër vite i ka trajtuar forumet e rëndësishme vendimarrëse të PD-së, thjeshtë si formalitete. Por nga ana tjetër është përpjekur të bëjë kujdes që të ketë në kryesi edhe disa personalitete me vlera akademike e profesionale, me qëllim ruajtjen e imazhit të një institucioni mjaft të rëndësishëm siç është kryesia e PD.
Përpos kësaj, kryesia reflekton edhe karrierën politike të individëve, të cilët janë shprehje e kontributit ndër vite. Rigjenerimi i kryesis së PD bëhet në mënyrë graduale, konkuruese e natyrisht edhe të kujdesshme, pasi është dhe vitrina e partisë. Futja e elementëve pa përvojë politike, me kontribute thuajse zero, pa asnjë spikatje në fushën profesionale apo intelektuale, natyrisht që në mos sot, nesër kthehen në barrë për partinë. Për shkak të llogarive me natyrë personale që bën kryetari i PD, kur i kandidon për anëtarë kryesie, ata mendojnë se postet ju takojnë dhe nuk bëjnë asgjë për ta merituar. Eshtë pikërisht ulja e stekës, sa i përket profileve të anëtarëve të kryesis, ajo që më pas e bën këtë institucion të rëndësishëm partiak të bjerë në nivele aspak serioze. E njëjta problematikë shihet dhe sa i përket përfaqësimit të nivelit parlamentar. PD duket se ka hyrë jo në një krizë elektorale, por në një krizë identiteti, e cila është me pasoja më afatgjata se një krizë zgjedhore. Të përpiqesh të shesësh sot nivelin e kryesis së PD si nivelin më të lartë akademik e elitar në vend, tregon realisht se PD ka një problem serioz me vetëveten. Sa për ilustrim të akuzosh Ramën pse zihet Gjana me Mezinin në kryesinë e PD është shembulli më i qartë i krizës së identitetit dhe i varfërisë intelektuale.
