Kryetarja e Kuvendit të Kosovës, njëherësh nënkryetare e LDK-së, Vjosa Osmani në komentet e dërguara Gjykatës Kushtetuese në lidhje me dekretin e presidneti, Hashim Thaçi që i ka dhënë Avdullah Hotit mandatin për formimin e qeverisë së re, ka kërkuar që gjykata të shpallë dekretin e presidentit në kundërshtim me Kushtetutën.
Osmani ka thënë se përmes këtij dekreti, Thaçi ka tejkaluar kompetencat e veta duke ndërhyrë në kompetenca të institucioneve tjera.
Osmani thekson se presidenti ka tejkaluar kompetencat kushtetuese, duke mos e respektuar parimin bazë të sistemit demokratik, pra ndarjen e pushteteve.
“Presidenti i Republikës së Kosovës ka tejkaluar kompetencat e veta kushtetuese, duke u thirrur në garantimin e funksionimit të institucioneve. Në fakt, përmes veprimeve të tij, Presidenti i vendit nuk ka respektuar parimin bazë të secilit sistem demokratik, parim i cili është i mishëruar edhe në sistemin juridik të Republikës së Kosovës: ndarjen e pushteteve”, shkruan në komentet e Osmanit.
Ajo po ashtu ka shtuar se Thaçi ka synuar amandamentimin e Kushtetutës.
“Presidenti i vendit përmes Dekretit të kontestuar nuk ka respektuar parimin kushtetues së ndarjes së pushteteve. Së dyti, Presidenti përmes Dekretit të kontestuar ka synuar të amendamentoj Kushtetutën e vendit, kompetencë e cila i takon ekskluzivisht Kuvendit. Së fundmi, Presidenti ka ngërthyer mbi vete kompetenca për interpretimin e Kushtetutës e që sipas së drejtës pozitive i takon Gjykatës Kushtetuese”, shkruan në dokument.
Osmani thekson se presidentit nuk i njihet kompetenca e kushtetutë-bërjes në asnjë formë.
Në rreth 40 komente të bëra në këtë dokument, Osmani ka cituar Nene të Kushtetutës së Kosovës, dhe ka dhënë arsye për të cilat ky dekret do të duhej të shpallej në kundërshtim me Kushtetutën.
Sipas saj, zbatimi i këtj dekreti do të ishte një precedent i rrezikshëm për parimin e ndarjes së pushteteve, dukë zhvlerësuar Kushtetutën.
“Zbatimi i këtij Dekreti do të krijonte precedent të rrezikshëm në raport me parimin e ndarjes së pushteteve, sepse do t’i lejonte Presidentit të vendit të ndërhyjë në kompetencat e Kuvendit si organ ligjvënës. Natyrisht, që me një precedent të tillë, edhe në të ardhmen, do të krijohej hapësirë për bartje të kompetencave kushtetuese me një dekret presidencial. Kjo do ta bënte Kushtetutën e vendit dokument të pazbatueshëm dhe jorelevant gjatë punës së institucioneve”, thuhet në këtë dokument.
g.kosovari
