Kryeministri Edi Rama ka njoftuar sot se një nga projektet më të reja do të jetë ofrimi i ushqimit të drekës për nxënësit e shkollave 9-vjeçare.
Sipas Ramës, ky program synon të mbështesë familjet dhe të krijojë një komunitet më të fortë social mes fëmijëve, duke ofruar mundësi për të gjithë ata që ndodhen në kushte më të vështira ekonomike.
“Do vëmë në jetë dhe projektin më të ri të përbashkët mes qeverisë dhe bashkisë që në shkollat 9-vjeçare të fusim edhe ushqimin e drekës.
Dhe të krijojmë mundësinë për të pasur më shumë komunitet, në sensin më shumë jetë të përbashkët edhe sociale mes fëmijëve, për të pasur më shumë aktivitete që prindërit në momentin që lënë fëmijën në mëngjes në shkollë, të mos e kenë kokën mbrapa dhe të mos detyrohen pastaj, të merren vesh me njëri tjetrin, kush do e lërë punën për të shkuar për ta marrë fëmijën për ta çuar në shtëpi etj, etj, po të bëjnë punën e tyre me orë të plota dhe nga ana tjetër patjetër dhe për të lehtësuar nga pikëpamja financiare një pjesë të familjeve që nuk e kanë shumë të lehtë jetën e tyre të përditshme ekonomike”, tha kreu i qeverisë.
