Kryeministri i Republikës së Malit të Zi, Dushko Markoviq do të vizitojë Republikën e Kosovës.
Fillimisht në Aeroportin Ndërkombëtar të Prishtinës, Kryeministri Markoviq do te pritet nga Zëvendëskryeministri Fatmir Limaj, ambasadori i Malit të Zi në Kosovë, Ferhat Dinosha dhe ambasadori i Republikës së Kosovës në Malin e Zi, Skender Durmishi.
Me pas Kryeministri i Republikës së Kosovës, Ramush Haradinaj organizon pritje me nderime shtetërore para ndërteses së Qeverisë për kryeministrin e Republikës së Malit të Zi, Dushko Markoviq.
Vizita e Markoviqit u anulua javën e kaluar për shkak se aeroplani i tij nuk mundi të aterronte në Aeroportin e Prishtinës. Në takim pritet veçanërisht të diskutohet për çështjen ende të pazgjidhur të demarkacionit ndërmjet Kosovës e Malit të Zi.
“Demarkacioni është temë e kryer për Malin e Zi. Marrëveshja është e nënshkruar nga të dy shtetet kurse Mali i Zi e ka ratifikuar në Parlament këtë marrëveshje. Mali i Zi e ka kryer obligimin e vet.
Kam besimin se parlamenti i Kosovës do të ratifikojë marrëveshjen. Zvarritja nuk i ndihmon zgjidhjes”, tha Markoviq kohë më parë, përgatiti Koha. (b.an)
