Situata në Lëvizjen Socialiste për Integrim nuk është fort e qetë pas largimit të shumë këshilltarëve dhe zërave për largimin e disa deputetëve.
Disa prej deputetëve të kësaj partie, nuk i janë bindur vendimeve dhe Monika Kryemadhit, siç është rasti i deputetit Bitri, Edmond Haxhinastos apo Edmond Panariti të cilët kanë marrë pjesë në komisione kur opozita ka bojkotuar.
Në intervistën e dhënë për gazetarin Roland Qafoku, Monika Kryemadhi ka thënë se ata janë shok të Ilir Metës dhe janë vendosur nga ai deputetë. Ajo la të kuptohet se ata mund të largohen.
“Secili ka gojën e vet, mendjen e vet të flasë dhe të shpjegojë qendrimin e tij. Asnjërin nuk e mban me zor në LSI as zotin Bitri, as Monikën e as njeri tjetër. Kush do të rrijë kush do, të iki. Ky grup parlamentar nuk është zgjedhja ime. Është zgjedhja e Ilir Metës.
Çdo deputet që kërkon ta shikojë veten e tij në LSI si shoku i Ilir Metës le ta shikojë si shok i Ilir Metës. Kryetar i LSI është Monika Kryemadhi dhe nuk është Ilir Meta. Kjo është e qartë për çdo gjë dhe e kam bërë të qartë edhe për grupin parlamentar.
Kush do të shkarravitet me Edi Ramën le të shkarravitet. Kush do që të shkarravitet me Taulant Ballën le të shkarravitet. Kush do të shkarravitet me Gramoz Ruçin le të shkarravitet. Lëvizja Socialiste për Integrim është një realitet politik”, tha Kryemadhi, e cila thumboi Edmond Haxhinaston dhe Edmond Panaritin, se nuk janë aktivë në Kuvend.
“Mos prisni që nga Edmond Haxhinasto të marrë shishen e ujit dhe të qëllojnë dikë apo Panariti të hedhë qesen me miell. Mos prit që Haxhinasto të qëllojë me grusht ndonjë njeri”, tha Kryemadhi./a.m.
