Monika Kryemadhi i është drejtuar zyrtarisht drejtuesve të SPAK me një kërkesë-memorie, e cila daton më 14 gusht 2025, ku kërkon zhvillimin e disa veprimeve hetimore shtesë në lidhje me dosjen penale në ngarkim të saj.
Në dokumentin e firmosur nga ajo dhe avokati Redi Llanaj, Kryemadhi i kërkon prokurorëve Altin Dumani, Arben Kraja dhe Sotir Kllapi që hetimi të jetë “i plotë, objektiv dhe i paanshëm”.
Në memo, Kryemadhi nënvizon se procedimi penal ndaj saj është ngritur mbi kallëzimet e Halit Valterit dhe Idajet Beqirit, ndërsa pretendimet e SPAK lidhen me “mosdeklarim pasurie” dhe “pastrim parash përmes kontratave të lobimit të vitit 2017”.
Ajo shkruan se “Prokuroria e Posaçme ka marrë të mirëqena pretendimet e kallëzuesve, pa verifikuar faktet konkrete mbi pagesat dhe origjinën e tyre”.
Në kërkesën e saj, Kryemadhi ngre disa pyetje konkrete për SPAK, raporton gazetarja e Klan News, Glidona Daci.
“Është hetuar nga prokuroria nëse janë derdhur pagesa në emër të LSI në llogarinë e GSIS? Nga cila llogari bankare janë bërë dhe cila është fatura përkatëse?”, pyet ajo në dokument.
“A është verifikuar ndonjë kërkesë zyrtare nga unë drejtuar ‘American Express’? Nëse po, kush është personi që e ka tërhequr dhe firmosur për marrjen në dorëzim?”, shton më tej.
Kryemadhi kërkon gjithashtu që prokuroria të sqarojë nëse “është pyetur shtetasi Adrian Shatku për pretendimet e SPAK” dhe nëse janë dërguar kërkesa zyrtare për bashkëpunim me autoritetet amerikane, “ashtu si janë pyetur kompanitë e tjera amerikane apo mjekët në spitalin ku është operuar”.
Në përmbyllje të dokumentit, ajo thekson se “rrethanat e lidhura me pyetjet e sipërcituara nuk janë hetuar nga organi procedurial” dhe kërkon që “të kryhen veprime hetimore shtesë për t’u dhënë përgjigje specifike fakteve objekt kërkese”.
Me këtë memo, Monika Kryemadhi synon të vërë në dukje mangësitë që, sipas saj, ekzistojnë në hetimin e SPAK, duke kërkuar që procedura të zgjerohet për të provuar “të vërtetën e plotë” lidhur me kontratat e lobimit në SHBA dhe akuzat për pastrim parash.
