Deputetja e Lëvizjes Socialiste për Integrim Monika Kryemadhi është përfshirë prej kohësh në një debat në distancë me ministren e Arsimit Lindita Nikolla për reformën në arsim. Kryemadhi avancoi edhe më tej sot në deklaratat e saj për të kundërshtuar reformën kur tha në studion e News 24 se “nëse PD do ankimonte reformën në Kushtetuese, LSI do e mbështeste”.
Por kur gazetarët i kujtuan Kryemadhit se edhe LSI votoi reformën, madje përgjegjëse direkte për Maturën Shtetërore është zv.ministrja e LSI Nora Malaj, Kryemadhi sërish u përpoq të largonte përgjegjësitë e LSI për reformën që sot e sulmon.
“Zv.ministrja çfarë është, një rrogëtare në institucion. Një karamele që ua jep partive politike. Zonja Malaj është profesioniste dhe e njeh sistemin e arsimit dhe ne i thoshim pse e merr ti përsipër politikisht që t’u dalësh maturantëve. Thoshte e kam detyrim moral e politik. Reforma favorizon universitetet private dhe oligarkët. PD-ja u bë palë sepse tha do ta çoj në Gjykatë Kushtetuese. Nëse do ta kishin çuar do bashkoheshim dhe ne”, deklaroi Kryemadhi.
