Kryetarja e LSI-së, Monika Kryemadhi ka publikuar një video nga takimi elektoral në qytetin e Lushnjës. Krah videos, Kryemadhi shkruan se Lushnja e do ndryshimin dhe kjo do të realizohet në kutinë e votimit, duke mbështetur LSI.
“Lushnja e do ndryshimin dhe do e realizojë atë në kutinë e votimit, duke mbështetur LSI numrin 6. Fitorja është afër, t’i japim forca për uraganin e ndryshimit që do e kthejë Shqipërinë në shtëpinë e shqiptarëve”, shkruan Kryemadhi.
Një ditë më parë, nga Lushnja, Kryemadhi u shpreh se “do të jem deputetja e Lushnjes për të shlyer çdo borxh ndaj jush, ndryshimi vjen tek fëmija dhe tek familja jonë”
“Lushnja ka qenë një qytet i cili e ka votuar LSI-në, jo vetëm Lushnja, por i gjithë qarku i Fierit. Gjithmonë që në ditët e krijimit të saj, qarku i Fierit i ka dhënë votë LSI-së dhe ka kërkuar që të përfaqësohet në Parlament me deputetë. Prandaj unë, Monika Kryemadhi si kryetare e LSI-së, kam ardhur dhe kandidoj në qarkun e Fierit, për të larë të gjitha borxhet ndaj qarkut të Fierit, ndaj jush, ndaj burrave dhe grave, ndaj fermerëve, ndaj të gjithë naftëtarëve në Fier, ndaj të gjithë të rinjve dhe të rejave, por më shumë ndaj familjeve tuaja, që ne në këto vite kemi lejuar djemtë dhe vajzat tuaja të largohen nga shtëpitë, sepse nuk kanë mundësinë e punësimit. Ky është një borxh, që unë si nënë, si vajzë, e marr përsipër përballë jush, sepse nëse ne nuk do të kuptojmë që herë pas here duhet të kthejmë kokën pas, për të parë ku ishim dhe ku jemi, për të kuptuar kush na jep dorën, për të kuptuar kush na ndihmon, për të kuptuar kush të do dhe suporton me të vërtetë, atëherë ne nuk kemi sjellë asnjë ndryshim”, u shpreh dje Kryemadhi.
g.kosovari
