Kryetarja e Lëvizjes Socialiste për Integrim, Monika Kryemadhi deklaron se socialistët po i bashkohen forcës politike që ajo drejton. Në një takim me banorët në Peqin, Kryemadhi akuzoi kryeministrin Edi Rama se kërkon votën e qytetarëve në këmbim të vaskinës kundër COVID-19.
“Në çdo moment ndjej shkërmoqjen e rilindjes dhe shumë socialistëve në radhët e LSI-së. Një kryeministër i cili ka një urrejtje patologjike për njerëzit e tij sepse mjafton të dëgjosh kush nuk më voton mua, kush nuk më përkrah mua nuk bën vaksinën”, tha Kryemadhi.
Sipas saj, në 8 vite qeverisje të socialistëve, në Shqipëri janë taksuar të varfërit dhe jo të pasurit.
“Rama dhe rilindja kanë taksuar të varfërit, ata që s’kanë mundësi dhe nëse ti nuk paguan taksat përfundon në burg”, u shpreh kryetarja e LSI.
Kryemadhi shpjegoi dhe ndryshimin mes kandidatëve për deputet të Lëvizjes Socialiste për Integrim dhe atyrë të PS.
“Kandidatët e LSI, ndryshe nga kandidatët e rilindjes nuk kanë fokus kush merr vota për të thyer listën, ka fokus si të shtojmë vota te kutia për LSI-në”,
Kryetarja e Lëvizjes Socialiste për Integrim iu bëri thirrje qytetarëve që të ndëshkojnë me votë qeverinë “Rama”, duke thënë se ka detyruar të rinjtë të largohen nga Shqipëria.
/a.r
