Sheshi Skënderbej do të hapet për të gjithë qytetarët më 10 qershor. Lajmi u dha nga kryebashkiaku Erion Veliaj, i cili sëbashku me Kryeministrin Edi Rama vizituan ambientet çlodhëse dhe rekreative të këndit të lojërave në Parkun e Madh të Liqenit ku bashkëbiseduan me prindër e gjyshër të cilët janë frekuentues të këtij ambienti.
“Sheshi ka dalë shumë bukur, këtë javë do testojmë shatërvanët, të shikojmë sa mirë funksionojnë. Kemi mbjellë shumë pemë rreth e rrotull, do ketë një pjesë me hije me pemë, një pjesë e kemi bërë vetëm me ullinj, një pjesë e kemi bërë vetëm me pemë frutore, portokalle, limon, fiq. Vend fantastik nëse keni biçikletë, patina, është e pjerrët po të hipësh në majë”, tha Veliaj. Edhe kryeministri Rama vlerëosi realizimin e këtij projekti duke e cilësuar fanstastik.
Gjithashtu, Veliaj prezantoi punën që është bërë në këtë zonë, që e cilësoi “një punë si të qëroje oriz” për të hequr pikat e zeza që kishin zaptuar zonën. “Nga lejet që janë dhënë në Farkë janë fut disa pallate si pykë, ato nuk i zhbëjmë dot, aty jetojnë njerëz kështu që ka një çikë devijim nga plani fillestar. Por masterplani ka dalë mirë. Dje kur dolëm për vrap nga ora 7 pasdite, nuk bëje dot vrap aq shumë njerëz kishte. Kemi ende disa shpronësime, ndërtime pa leje që janë legalizuar në kohën e tyre. Derdheshin gjithë gropat septike në liqen. Kështu që ka filluar procesi i zhvendosjes. Por ka qenë realisht si të qërosh oriz, gjithë pikat e zeza rreth liqenit. Sidomos pjesa e Farkës ka qenë një katastrofë”, u shpreh Veliaj .
Kreu i Bashkisë deklaroi se falë ndërhyrjes së Bashkisë së Tiranës janë ndërtuar një sërë ambientesh të ndryshme për të gjitha grupmoshat, duke e shndërruar Parkun e Madh të Liqenit në një nga hapësirat më të frekuentuara në kryeqytet. “Këtu është ndarë me kënde, për mosha deri në 3 vjeç ka ambiente ato kodrinat e vogla, ndërkohë që pjesa e adoleshentëve dhe e më të rriturve vazhdon në drejtim të kishës ku është fusha e basketbollit, scateboard etj. Ngaqë ka pas shumë sukses, ka një fluks të paimagjinueshëm sidomos pasdite. Kështu që do të përfundojmë edhe pistën e vrapit. Po bëjmë edhe shtigjet e biçikletave që mos të ndërhyjmë me ata që bëjnë vrap. Ndërkohë që fusha lart kryesisht janë për ekipe të organizuara. Shkollat e mesme përdorin fushat e basketbollit dhe të volejbollit”, tha Veliaj.
Duke folur për rritjen e hapësirave të gjelbra në kryeqytet, Veliaj deklaroi se po punohet me ritme të shpejta që brenda 2030 të mbillen 2 milionë pemë, në kuadër të projektit për Pyllin Orbital.
ma.me
