Kryetari i Bashkisë së Tiranës, Erion Veliaj, ka publikuar sot më 18 nëntor, një letër inkurajuese që i është dërguar nga kryebashkiaku i Stambollit, Ekrem İmamoğlu, i cili ndodhet në burgun e Silivrisë.
Veliaj shpreu mirënjohjen e tij të thellë për mbështetjen e vazhdueshme: “E çmoj pa masë çdo letër dhe çdo fjalë mbështetëse që më dërgoni çdo ditë”, shkruan ai.
Në letrën e tij, İmamoğlu uron rikthimin e mandatit të Veliajt nga Gjykata Kushtetuese, duke e cilësuar atë si një hap domethënës për demokracinë. “E prita me kënaqësi lajmin se ju është rikthyer mandati i fituar në mënyrë demokratike. Kjo është një shenjë besimi në qeverisjen demokratike dhe sundimin e ligjit”, thuhet në letrën e Imamoglu.
Veliaj theksoi se është prekur nga fjalët e mikut të tij. “E falënderoj nga zemra mikun tim për fjalët e ndjera dhe solidaritetin e pashoq”.
Në letrën e gjatë, İmamoğlu vlerëson rezistencën e Veliajt në një periudhë sfiduese. “Forca juaj e qetë dhe përkushtimi ndaj shërbimit publik kanë qenë thellësisht frymëzuese”. Imamoglu nënvizon se beteja për demokraci është universale. “Lufta për demokraci në një vend është luftë për demokraci kudo”, shprehet ai.
Veliaj, në reagimin e tij, shprehu vlerësimin për këtë mesazh. “Fjalët e tij janë një kujtesë e çmuar se demokracia mbrohet me kurajo dhe besim”.
Në fund, İmamoğlu i uron Veliajt që të kenë një takim në të ardhmen. “Shembulli juaj i jep forcë shumëkujt që besojnë në drejtësi dhe demokraci. Pres me padurim të takohemi sërish si miq dhe kolegë”.
Letra është cilësuar nga Veliaj, si një mbështetje e rëndësishme në një moment delikat.
“Solidariteti i kryetarit të Stambollit më jep forcë për të ecur përpara në shërbim të qytetit dhe të vlerave tona”, thekson kryebashkiaku i Tiranës.
