Nëse shpresonit që Vllaznia do të privatizohej në fund të këtij sezoni, harrojeni. Një gjë e tillë nuk do të ndodhë dhe klubi rrezikon seriozisht falimentimin, pasi do ishte mënyra e vetme për të shpëtuar. Siç u bë e ditur, klubi ka një borxh prej 1 miliard e 50 milionë lekë të vjetra ndaj Drejtorisë së Tatimeve.
Shkodra.News kontaktoi me përfaqësues të këtij institucioni rreth një lajmi të tillë dhe ky borxh pohohet edhe nga vetë Tatimet. Madje, mësohet se Drejtoria e Tatimeve i ka bllokuar të gjitha llogaritë bankare klubit shkodran dhe nuk mund të kryejë asnjë transfertë apo transport në doganë.
Masat janë ndërmarrë deri në pagesën që do të kryhet për këtë borxh. Por, jo vetëm kaq. Privatizimi, ajo që është më kryesorja tek Vllaznia, nuk do të bëhet pa paguar këtë borxh. Pra, nëse ndonjë biznesmen kërkon të marrë ekipin e Vllaznisë dhe paguan për asetet e klubit, atëherë më parë duhet që të shlyejë këtë borxh, që nuk është krijuar për faj të tij, e më pas të marrë në administrim klubin Vllaznia.
Në fakt, në Drejtorinë e Ratimeve kanë lajmëruar disa herë që drejtuesit e Vllaznisë të marrin masa përballë një fakti të tillë, por siç duket drejtuesit shkodranë janë në gjumë. Problemeve me pagat e lojtarëve, mbijetesës së ekipit, tashmë i shtohet edhe borxhi i madh ndaj Tatimeve. Vetëm Zoti mund ta shpëtojë Vllazninë, pasi drejtuesit në Bashki e shkatërruan atë. Sa keq…
ma.me
