Policia e Durrësit ka finalizuar një operacion anti-drogë ditën e djeshme, ku është bërë e mundur sekuestrimi i një sasie të madhe droge dhe municionesh. Blutë e Durrësit bëjnë me dije se gjatë kontrollit të ushtruar në vendin e quajtur “Guri i Kuq” , në pyllin e fshatit Barkanesh, Krujë janë gjetur dhe sekuestruar 3 fuçi plastike, brenda të cilave janë gjetur 15 thasë plasmasi me peshë rreth 68.3 kg lëndë narkotike Cannabis Sativa.
Po ashtu, është gjetur edhe një kavanoz qelqi, i gjetur i mbushur me farëra të dyshuara të llojit Cannabis Sativa me peshë rreth 408 gr.
Por, përveç lëndës narkotike policia ka gjetur edhe 2 kallëpë tritoli me peshë 100 gr secili; 1 granatë offensive; 1 ndezëz unifikues granate; 1 armë gjysëm automatike mod 56; 283 copë fishekë mod 63 dhe fishekë luftarakë të kalibrit 7.62 mm; 1 krehër për armë automatike, mod 7.62 mm.
Lidhur me këtë ngjarje, policia bën me dije se ende nuk ka persona të arrestuar, ndërsa shton se po punohet për identifikimin dhe kapjen e autorëve të implikuar në këtë veprimtari kriminale. Materialet i kaluan Prokurorisë së Rrethit Gjyqësor Durrës për veprime të mëtejshme për veprat penale “Prodhimi dhe shitja e narkotikëve” dhe ”Prodhimi dhe mbajtja pa leje e armëve luftarake dhe e municionit”.
ma.me
