Mungesa e përfaqësimit Parlamentar e forumit rinor dhe demotivimi i tij në fushatë për shkak të mos mbajtjes së premtimit të Bashës për të patur 35 për qind të listave të deputetëve me anëtare të forumit, u konsiderua si një nga arsyet e humbjes se Partisë Demokratike në zgjedhje.
Por Lulzim Basha dhe kreu i forumit, Belind Këlliçi, bashkë me të rinjtë, po bëjnë një përpjekje për të tejkaluar ngërçin. Një mbledhje maratonë prej pesë orësh mbrëmjen e së martës ishte përpjekja e parë.
“Është vënë një tullë e parë besimi në këtë marrëdhënie dhe është bërë një hap i parë shumë i rëndësishëm, sepse për herë të parë kryetari e ka pranuar edhe vetë që është bërë gabim dhe sot nuk kemi asnjë përfaqësues. E rëndësishme është të shkojmë përpara dhe gabimet të mos përsëriten”, u shpreh Këlliçi.
Prova e parë e besimit mes të rinjve demokratë dhe Lulzim Bashës do të garantohet ama nga ndryshimet në statut, me qëllim përcaktimin e mekanizmave të qartë për përfaqësimin e forumit rinor në çdo nivel vendimmarrjeje.
“Kemi rënë dakord për një platformë bashkëpunimi për disa ndryshime në status. Që do të garantojnë përfaqësimin e forumit jo vetëm në grup, po edhe në organet vendimmarrëse të PD, në këshilla bashkiake, pse jo edhe me kandidate për kryetare bashkish”, shton Këlliçi.
Nëse rezulton e suksesshme, rivendosja e besimit me forumin rinor do të jetë një hap i rëndësishëm i Lulzim Bashës për të bashkuar rreth vetes pjesën e pakënaqur, qe nuk i është bashkuar ende grupit të kritikeve të tij, ish-drejtues të lartë demokratë, që kanë krijuar tashmë lëvizjen për ringritjen e Partisë Demokratike. Por për kreun e forumin kjo është një çështje e mbyllur.
ma.me
