Përfaqësuesja e Lartë e Bashkimit Europian e zhveshi veten nga gjuha diplomatike për t’i përçuar mesazhin e drejpërdrejtë Presidentit maqedonas, Gjorge Ivanov se gaboi me refuzimin e mandatimit të Zoran Zaev për formimin e qeverisë së re. Federica Mogherini, e cila po zhvillon takime me drejtuesit e partive politike në Shkup doli para mediava pas takimit me Presidentin Ivanov.
“Kërkojmë nga Presidenti Gjorge Ivanov që të mos shkelë parimet themelore të demokracisë dhe të reflektojë dhe të ndryshojë vendimin që i refuzon mandatimin Zoran Zaev, liderit të partisë së dytë fituese në zgjedhje”, tha ajo.
Më herët, Mogherini u takua edhe me Zoran Zaev, i cili tha se kishte marrë garancitë dhe përkushtimin e Bashkimit Europian për të ardhmen demokratike të Maqedonisë. Kriza politike në Maqedoni u përshkallëzua të mërkurën pas vendimit të Presidentit vendas për të refuzuar mandatimin e Zaevit. Ky i fundit ka siguruar mbështetjen e 67 deputetëve, përfshi atyre shqiptarë, për formimin e qeverisë së re. Ivanov justifikoi refuzimin me “rrezikun që paraqet për pavarësinë dhe sovranitetin e Maqedonisë platforma e partive shqiptare”.
ma.me
