Kriza brenda opozitës nuk ka prekur vetëm Partinë Demokratike por edhe marrëdhëniet me aleatët. Pas zgjedhjeve të 25 Prillit PD ndau rrugët me partitë aleate duke mbajtur një qëndrim të distancuar.
Sekretari i Përgjithshëm i LSI Endrit Braimllari tha në Publikisht në RTSH se pas zgjedhjeve nuk ka pasur më asnjë tryezë aleatësh dhe biseda e fundit e kryetares Monika Kryemadhi me kryedemokratin Lulzim Basha ka qenë në datën 27 Prill në lidhje me qëndrimet politike.
“LSI nuk e ka ndryshuar rolin e opozitës së bashkuar edhe kur ka pasur përplasje sepse qëllimi kryesor ishte largimi i Edi Ramës. Pas 25 prillit nuk ka pasur asnjë tryezë të aleatëve pas 25 prillit. Kjo për shkak të vullnetit të zotit Basha. Po qëndrimi dhe besimi ka qenë i qartë.
Ka pasur një komunikim të kryetares së LSI më 27 prill që ka bërë të qartë qëndrimin e LSI dhe marrjen e mandateve në shtator. Kemi tentuar të komunikojmë”, tha ai.
Sipas Braimllarit kjo ka ardhur për shkak të vullnetit të Bashës i cili sipas tij, pas zgjedhjeve të 25 prillit e futi partinë në një proces zgjedhor duke u distancuar nga retorika për masakrën zgjedhore. Kjo, tha Braimllari u bë për të shfokusuar vëmendjen nga kjo çështje në favor të Ramës.
“Po qëndrimi ka qenë ky që asnjë komunikim publik në raport me problemet që mund të kishte brenda Partisë Demokratike. Basha e futi partinë në proces zgjedhor. LSI filloi të mbante retorikën e masakrës zgjedhore ndërsa PD shfokusoi vëmendjen nga kjo masakër zgjedhore.
Ky distancim ka një arsye sepse ai është në marrëdhënie të drejtpërdrejtë me Edi Ramën. Sulmet ndaj presidentit ishin për të tërhequr vëmendjen nga problemet e brendshme të PD. Ne iu vumë në dispozicion të plotë. Ne kemi pasur debat brenda kryesisë së partisë”, deklaroi Braimllari./m.j
