Grupi anti-Basha ka gati platformën statutore për demokratizimin e PD. Kështu u shpreh anëtari i Këshillit Kombëtar të PD, Edvin Kulluri i ftuar në studion e Report Tv. Ai tha se propozimet synojnë decentralizimin e pushtetit në parti në mënyrë që drejtimi ekzekutiv i PD të mos jetë në dorë të një personi të vetëm.
Kulluri tha se organizimi i PD duhet të jetë njësoj si pushteti legjislativ në qeverisje, e njëjta formulë organizimi si partitë simotra të PD, Kristian Demokratët gjermanë dhe Konservatorët anglezë, arsye për të cilat Basha duhet të pranojë propozimet. “Propozimet konsistojnë në decentralizimin e pushtetit në parti dhe krjimin e një rrjeti institucionesh dhe funksionesh që do balancojnë atë që sot është një drejtim arbitrar i PD nga një person i vetëm.
Të kalojmë nga një part one man show në një parti politike serioze, ku të ketë një bllok ekzekutiv, të ngjashëm me atë legjislativ në qeverisje, të ketë një gjykatë ku njerëzit të ankohen dhe të ketë fuqinë të gjykojë sjelljen e organeve që drejtojnë partinë.
Të krijohet një balancë ku kryetari i partisë të jetë drejtuesi ekzekutiv dhe kandidati për kryeministër, por që s’mund të drejtojë edhe grupin parlamentar edhe këshillin kombëtar edhe seksionet. Vendi sot është shumë më demokratik se partitë që e ndërtojnë sistemin”, tha Kulluri.
Sa i takon paralajmërimeve të nënkryetarit të PD, Edi Paloka për nisjen e protestave, Kulluri tha se PD s’ka kapacitete për të ngritur njerëzit. “Aty ku ka pasur një akt të fortë që duhet të ishte një aksion, në 18 shkurt, përfunduan në çadër. Unë mendoj se e gjithë kjo situatë kërkon një kundërpeshë nga opozita, e cila nuk jam i sigurt se ka kapacitetin për të ngritur njerëzit në protestë dhe për të rrëzuar këtë qeveri që është e zhytur në korrupsion dhe krim“.
Si e shikoni reagimin e opozitës për ngjarjet e fundit kriminale?
Situata në vend është e rëndë. Kemi përfundimisht një sistem oligarkik, një bashkim të krimit me politikën, pra jemi në një krizë të thellë ekonomike, politike dhe nga pikëpamja e sigurisë së brendshme shumë e rëndë. Nuk ka ditë që të mos shohim lajme për korrupsion, krim, drogë me tonelata. Ne si opozitë kemi folur 4 vjet për këtë punë, sot është gjithçka e qartë në sytë e shqiptarëve. Opozita ka një defekt, sot nuk është koha për retorikë, por për aksion. Dëgjova nënkryetarin e PD, z. Palokën që foli për aksion, por këto katër vite nuk ka pasur aksion, përveç disa protestave nuk ka pasur asnjë akt. Aty ku ka pasur një akt të fortë që duhet të ishte një aksion, në 18 shkurt, përfunduan në çadër. Unë mendoj se e gjithë kjo situatë kërkon një kundërpeshë nga opozita, e cila nuk jam i sigurt se ka kapacitetin për të ngritur njerëzit në protestë dhe për të rrëzuar këtë qeveri që është e zhytur në korrupsion dhe krim.
Është bërë analiza e PD zgjedhjeve në bazë?
Unë mendoj se analiza e PD është bërë pas zgjedhjeve, është bërë nga ne për rezultatin katastrofik. Analizën e ka bërë Basha në formën e tij duke mos mbajtur asnjë përgjegjësi. E ka bërë ish-lideri historik i partisë publikisht. Analiza në bazë është diçka e vonuar dhe sot është krejtësisht e pasens. Nëse do bënte një analizë reale, do fillonte me përgjegjësinë e kryetarit të partisë të cilën ai nuk e mori. Shkuarja në bazë është i pakuptimtë, është një akt jo-politik, është i pakuptimtë tani.
Ju së bashku me disa kolegë keni përgatitur disa ndryshime statutore që do t’i dërgohen z.Basha. Cilat janë këto ndryshime?
Është një propozim për t’i dhënë zgjidhje krizës së thellë të legjitimitetit ku ndodhet partia. Propozimet konsistojnë në decentralizimin e pushtetit në parti dhe krjimin e një rrjeti institucionesh dhe funksionesh që do balancojnë atë që sot është një drejtim arbitrar i PD nga një person i vetëm. Të kalojmë nga një part one man show në një parti politike serioze, ku të ketë një bllok ekzekutiv, të ngjashëm me atë legjslativ në qeverisje, të ketë një gjykatë ku njerëzit të ankohen dhe të ketë fuqinë të gjykojë sjelljen e organeve që drejtojnë partinë. Të krijohet një balancë ku kryetari i partisë të jetë drejtuesi ekzekutiv dhe kandidati për kryeministër, por që s’mund të drejtojë edhe grupin parlamentar edhe këshillin kombëtar edhe seksionet. Vendi sot është shumë më demokratik se partitë që e ndërtojnë sistemin. Statuti i sotëm i PD është shumë më i keq se ai i vjetri. Të gjitha këto propozime kanë një model, i janë referuar modeleve më të mira të kristian demokratëve gjermanë dhe konsvertorëve anglezë, duke i përshtatur me aktualitetin tonë. Por a do mjaftojnë ndryshimet statutore? Kjo pastaj është çështje tjetër. Zgjedhjet lokale po vijnë. Kjo është një mundësi për Bashën dhe PD që të dalë nga kriza e thellë dhe serioze ku ndodhet aktualisht.
