Prokurori i Përgjithshëm i Kroacisë, Drazhen Jeleniç, i cili u emërua në këtë post më 24 prill 2018, dha dje dorëheqjen, pasi anëtarësimi i tij në një organizatë masone kishte provokuar kritika të ashpra.
”Që nga dita e parë e emërimit tim si kryeprokuror i shtetit, kam kryer detyrën me krenari, angazhim, profesionalizëm dhe në mënyrën e duhur”, thuhet në letrën e dorëheqjes.
”Detyrën e kam kryer në përputhje me kushtetutën e vendit dhe duke ruajtur pavarësinë e autoriteteve shtetërore të prokurorisë”, shtohet në të.
Ai gjithashtu komenton për insinuatat e fundit në lidhje me anëtarësimin e tij në një organizatë masone.
“Ky anëtarësim në një shoqatë juridike nuk ka ndikuar në asnjë mënyrë në kryerjen e detyrave të mia”, këmbëngul Jeleniç.
”Sidoqoftë, në rrethanat aktuale, dorëheqja ime është e vetmja zgjidhje morale dhe e përgjegjshme”, thotë ai. /e.s/
