Kur nuk kanë kaluar veçse disa orë pas lamtumirës së fundit dhënë Dritëro Agollit, vajza e tij, Elona duket se reagon për një pjesë të mirë të fjalëve dhe zhurmës (në disa raste jo aq dashamirëse), që është bërë nëpër media apo rrjete sociale duke folur për shkrimtarin e njohur.
Ajo nuk futet në polemika dhe as shkruan vetë ndonjë fjalë, por shumë thjesht u jep përgjigjen e merituar një pjese të mirë të këtyre fjalamanëve me një shkrim publicistik të të atit.
Pjesa është shkëputur nga përmbledhja publicistike e Dritëro Agollit, “Teshtimat e lirisë”.
Ja çfarë shkruhet në këtë pasazh: “Keni ecur ndonjëherë përmes një livadhi me karkalecë? Ata kërcejnë përpara fytyrës tënde. Ti i përze me dorë, qindra të tjerë të hidhen në sy, në hundë, në vesh, në qafë. Ti vrapon, ata të mblidhen si re. Mua më kërcejnë çdo javë nga livadhi i gazetave mijëra fjalë-karkalecë. E përze një tufë, një tjetër më lëshohet duke kërcyer. Tani, së fundi, edhe dy karkalecë pleq m’u lëshuan, duke kërcyer nëpër livadhin e gazetave me kërkërimat e tyre plot instikt të lashtë insekti”.
Siç vëren Elona, ky është paragrafi me të cilin nis shkrimi “Betohen për të vërtetën, puthen me gënjeshtrën”, shkruar 25 vjet më parë, në vitin 1992./dita/b.d
