Ish-presidenti i Shqipërisë zoti Bamir Topi shprehu hapur kritikat ndaj rolit të presidentit të vendit. Zoti Topi tha se presidenti i vendit ka detyrimin të flasë dhe të reagojë për çështje specifike që i takojnë vetëm atij si Kreu i Shtetit.
Fjala e plotë e ish-presidentit Bamir Topi:
“Në të gjithë rrugëtimin që kanë pasur presidentet, ata ndonëse janë zgjedhur nga mazhoranca politike, kanë pasur probleme me mazhorancën. Shpesh kjo marrëdhënie mbetet e trajtuar në sipërfaqe. Vërtetë presidenti është Kryetar i Shtetit, është një pozicion shumë i rëndësishëm, por me ndryshimet e herë pas hershme që ka bërë politika, shpesh duket i vendosur në qoshe.
Presidentit i ka humbur roli i vërtetë.
Ka raste shumë të rëndësishme dhe të freskëta në vend, që më shumë se çdo herë tjetër, i takon Kreut të Shtetit, i cili përfaqëson kombin, njerëzit, duke presupozuar që është jashtë interesave politike që të flasë në emër të të gjithëve. Këtu ndodhin paradokse.
Nuk mund të flasë kryeministri në emër të presidentit. Për më tepër që roli i kryeministrit, cilido qoftë ai, ka interesa jashtëzakonisht specifike për një pjesë të shoqërisë. Presidenti duhet minimalisht të zbatojë protokollin dhe kjo është shumë e rëndësishme, sepse roli i presidentit qoftë edhe protokollar në raste të veçanta, është shumë domethënës për ndjeshmërinë e shoqërisë, marrëdhënien ndërkombëtare dhe për atë që përfaqëson një president”, u shpreh zoti Topi.
