Është zhvilluar këtë të diel në Gjykatën e Korçës seanca gjyqësore për 18-vjeçarin Devis Hoti, i cili dyshohet të jetë autor i krimit horror, që tronditi qytetin juglindor, ku u vra me thikë dhe u dogj në një pjesë të trupit shtetasi Flamur Duçi.
“BalkanWeb” sjell pamje te cuditshme nga brenda seancës, ku shihet autori i krimit të tmerrshëm shihet i qetë dhe i heshtur në sallën e gjyqit, madje në një moment edhe i buzëqeshur. Në video, shihen duke qeshur edhe anëtarët e trupës gjykuese, të cilët caktuan masën “arrest me burg” për 18-vjeçarin.
Avokati i të riut kërkoi një masë më të lehtë për 18-vjeçarin, duke sugjeruar “arrest shtëpie” ose burg me afat 30 ditor, por gjykata nuk ka pranuar, duke e lënë në burg pa afat.
Nga ana tjetër, siç raporton gazetarja Lorena Kodra, Prokuroria ka zbardhur detaje tronditëse nga krimi horror. Sipas organit të Akuzës, Flamur Duçi ka tentuar të heqë bluzën, në momentin që kushëriri e ka qëlluar disa herë me thikë dhe i ka vënë flakën, për ta djegur.
Ndërkohë, po sipas Akuzës, në trupin e viktimës janë gjetur 8 dëmtime me thikë, ndërsa në dorë mbante një fije floku, që i është marrë për provë dhe pritet t’i bëhet testi i ADN-së, për të zbuluar autorin e vërtetë të krimit. Gjithashtu, viktima ka rezultuar me djegie të shumta në krah dhe trup, ndërsa në dyqan dhe rrugë ka pasur gjak, por mungon thika e bulmetit, me të cilën është kryer krimi.
Nga ana tjetër, edhe i dyshuari për krimin rezulton me lëndime në trup, çka ngre dyshimet që të ketë pasur përleshje mes tyre, para se të ndodhte krimi. Nga përgjimet ambientale të siguruara deri më tani, ka rezultuar se autori i dyshuar po përpiqet të trillojë për ngjarjen dhe të detyrojë familjarët të gënjejnë, dhe kjo ka shtuar më tepër dyshimet se ai mund të jetë vrasësi i Flamur Duçit.
