Dosja e skadalit të tokave të grabitura në Vlorë do të kalojë për hetim te Prokuroria e Krimeve të Rënda. Deri më tani, mbi këtë çështje hetonte prokuroria e qytetit bregdetar, e cila ka vënë nën sekuestro 340 hektarë troje me një vlerë tregu prej 240 milionë eurosh.
Nga hetimet e deritanishme rezulton se, skema e falsifikimit të dokumenteve në këto raste është realizuar nga i njëjti grup personash dhe janë krijuar dyshimet e arsyeshme se kemi të bëjmë me një grup të strukturuar kriminal.
Për këtë arsye, Prokuroria e Vlorës ka shpallur moskompetencën, duke ia kaluar aktet Prokurorisë së Krimeve të Rënda, e cila është përgjegjëse për hetimin e veprave penale në kuadër të grupit të strukturuar kriminal.
Në përbërjen e këtij grupi janë përfshirë zyrtarë lokalë, të cilëve u janë ngarkuar detyra konkrete në lidhje me falsifikimin apo dhe regjistrimin e pasurive të paluajtshme, zyrtarë të punësuar pranë Gjykatës dhe Hipotekës së Vlorës.
Sipas prokurorisë rezulton se, ky grup kriminal është krijuar me qëllimin e vetëm për të përfituar pasuri të paluajtshme në zonën bregdetare të Qarkut të Vlorës, përmes falsifikimit të dokumenteve nëpër institucione të ndryshme shtetërore.
Tokat e sekuestruara gjenden në Palasë, Karaburun dhe Zvërnec, respektivisht me sipërfaqe 33 ha, 220 ha dhe 89 ha, ndërsa personat nën hetim janë: Pullumb Petritaj, Enkes Hysendhima, Blerina Dhrami, Rajmond Mezi, Donika Besimaj, Lefter Gjergji dhe Belona Seraj./TCH/a.k
