Mjekët veterinarë do ta ushtrojnë profesionin e tyre pasi të jenë anëtarësuar në Urdhrin e Mjekut Veterinar.
Një projektligj i propozuar nga Ministria e Bujqësisë dhe i depozituar për miratim në parlament parashikon ngritjen e këtij Urdhri, duke pasur qëllim kryesor mbrojtjen e interesit publik dhe shëndetit të kafshëve, si dhe duke garantuar kompetencë nga veterinerët në ushtrimin e këtij profesioni.
Projekti i ri synon gjithashtu vendosjen e standardeve në ushtrimin e profesionit të mjekut veterinar, ndërsa objekt të tij ka dhe kufizimin e së drejtës për ushtrimin e këtij profesioni vetëm nga veterinarët. Pr/ligji do të zbatohet për kategorinë e mjekëve, farmacistëve dhe teknikëve veterinarë.
Neni 7 i draftit përcakton se kategoritë që mund të bëhen anëtarë të Urdhrit janë: a) individët e diplomuar si mjekë veterinerë; b) veterinerët që pranojnë Kodin e Etikës Profesionale të Mjekut Veterinar dhe që e ushtrojnë këtë profesion në: i. Shërbimin Veterinar Shtetëror; ii. Institucione, struktura dhe ente të tjera publike; iii. Shërbimin veterinar privat. Ndalimet për të ushtruar profesionin e veterinerit përcaktohen në nenin 8, ku anjë individ nuk mund të ushtrojë profesionin e veterinerit në Republikën e Shqipërisë, pa qenë anëtar i Urdhrit të Mjekut Veterinar.
