Kryetarja e Komisionit të Sigurisë Ermonela Felaj ka paralajmëruar hapjen e dosjeve të bujshme me ngritjen e Strukturës së Posaçme Antikorrupsion. Në një prononcim për gazetën “Sot” Felaj u shpreh se SPAK do e nisë punën me hetimin e krimit dhe korrupsionit në nivele të larta pushtetarësh, ku deklaroi se kjo strukturë do të jetë e përbërë nga prokurorë të ndershëm dhe të pakorruptuar.
Kryetarja e Komisionit të Sigurisë deklaroi më tej se ekzistojnë gjithmonë shkaqe procedurale që të çojnë në rifillimin e hetimeve për çështje të caktuara, hetimi për të cilat është pezulluar.
“SPAK u krijua për të hetuar krimin e zyrtarëve dhe ish zyrtarëve. Në këtë kuptim askush nga zyrtarët e mëparshëm që ka shkelur ligjin nuk është i imunizuar prej ushtrimit ndaj tij të ndjekjes penale. Me fjalë të tjera ka gjithmonë shkaqe procedurale që mund të çojnë në rishikimin e një vendimi pafajësie, shfuqizimin e një vendimi pushimi apo rifillimin e hetimeve të një çështjeje për të cilën hetimet janë pezulluar. E rëndësishme është që këto rrugë e mjete procedurale të përdoren në mënyrë sa më efektive”, u shpreh Ermonela Felaj.
Rihapja e dosjeve
Kryetarja e Komisionit të Sigurisë paralajmëroi edhe rihapjen e dosjeve të bujshme, që sipas saj janë varrosur prej shumë vitesh.
Felaj deklaroi se shumë çështje janë mbyllur pasi krimi ka joshur gjyqtarë dhe prokurorë, duke shtuar se sistemi i ri i drejtësisë do të ketë pjesë të vetën prokurorë të ndershëm të cilët kanë kaluar në filtrat e vetingut, duke shtuar me bindje se këta prokurorë do të hedhin dritë mbi gjithë të vërtetat.
“SPAK presupozohet të këtë elementët e duhur në përbërje, pra prokurorë dhe prokurore, që falë eksperiencës së tyre dhe vullnetit për t’u angazhuar në një organ të tillë të posaçëm, mund dhe duhet të nxjerrin nga pluhuri i kohës dosje të varrosura. Të mos harrojmë se ato dosje janë varrosur falë joshjes prej krimit të dikujt; një gjyqtari, një prokurori apo një punonjësi policie, dhe fakti që të tre këto subjekte janë nën veting po ashtu mund të shërbejë fare mirë si një pikënisje për të hedhur dritë mbi të vërtetën. Pra çdo gjë uroj të funksionojë sipas ligjit dhe rast pas rasti, duke bërë të mundur jo thjesht trazimin e gjumit për dikë, por përballjen me drejtësinë e vërtetë”, u shpreh Ermonela Felaj.
/a.r
