Një 40-vjeçar në qytetin e Vlorës ka përfunduar në pranga pasi ka kryer marrëdhënie seksuale me një vajzë të mitur. Policia bën me dije se i arrestuari po ashtu ka tentuar të nxisë 15-vjeçaren dhe dy shoqe të saj të mitura për të konsumuar lëndë narkotike.
Procedim penal ka nisur edhe për një 33-vjeçar, i cili ka qenë prezent dhe ka shtyrë të miturat të konsumojnë lëndë narkotike.
“Specialistët e Seksionit për Hetimin e Narkotikëve të DVP Vlorë ndaluan shtetasin R. R., 40 vjeç, banues në Vlorë, për veprat penale “Marrëdhënia seksuale ose homoseksuale me të mitura” dhe “Nxitja për përdorimin e drogës”, pasi më datë 22.03.2025 dyshohet se ka kryer marrëdhënie seksuale me një 15-vjeçare. Gjithashtu, shtetasi R. R. dyshohet se në bashkëpunim me shtetasin F. Q., 33 vjeç (për të cilin ka nisur procedimi penal për veprën penale “Nxitja për përdorimin e drogës”), ka nxitur 15-vjeçaren dhe dy shoqe të saj, 15 dhe 16 vjeçe, për të përdorur lëndë narkotike. Veprimet procedurale për këtë rast janë kryer në prani të prindërve të shtetaseve të mitura, psikologes së DVP Vlorë dhe mbrojtësve ligjorë”, informon policia.
Në drejtimin e Prokurorisë vijojnë hetimet për zbardhjen e plotë të rrethanave të këtij rasti.
