Kreu i Kuvendit, Meta: Reforma në drejtësi të bëhet me konsensus

Meta ishte i pranishëm në Konferencën e Ambasadorëve e cila po mbahet në Kryesinë e Kuvendit. Në fjalën e tij ai ka vënë theksin tek reforma në drejtësi ku u shpreh se ajo duhet të miratohet me konsensus. Në vijim të fjalës së bashku me kryetaren e komisionit parlamentar për politikën e jashtme, Arta Daden, kanë falenderuar ambasadorët për rolin e rëndësishëm në përmirësimin e imazhit të Shqipërisë në arenën ndërkombëtare.

‘’Duhet të miratojmë ndryshimet kushtetuese të reformës në drejtësi dhe disa ligje të rëndësishme për zbatimin e tyre. Ne do bëjmë çdo gjë që kjo reformë të bëhet me konsensus që ne të përmirësojmë imazhin e vendit për të qenë partner më i besueshëm për ndërkombëtarët.

Dua të falenderoj komisionet dhe deputetët që janë angazhuar në komisione dhe delegacione. Dua të uroj të gjithë ambasadorët dhe ambasadoret, suksese në aktivitetin për përfaqësimin e vendit tonë’’, u shpreh Meta

Dade theksoi: ‘’Dua t’u falenderoj për punën që bëni dhe bashkëpunimin që na keni ofruar. Përmes kontakteve parlamentare ne mund të bëjmë shumë për të përmirësuar imazhin. Duke punuar shumë së bashku ne mund të lartësojmë edhe më tepër vendin në rrugën integrimit. Ju uroj çdo të mirë dhe punë të mbarë në shërbim të interesave të vendit’’.

ma.me