Kreu i SPAK, Arben Kraja, ka deklaruar dje se gjatë vitit 2020 janë kryer mbi 1 mijë subjekte të përgjuara, ku pjesa me e madhe e tyre për korrupsion.
Gjatë raportimit në Komisionin e Ligjeve, në lidhje me punën e institucionit që drejton, për vitin 2020, Kraja tha se puna e këtij institucioni ka qenë me shumë ngarkesë.
Kreu i SPAK theksoi se gjatë vitit që lamë pas, u rrit bashkëpunimi i SPAK me institucionet ndërkombëtare, duke shtuar se u goditën edhe pasuritë kriminale.
“Bashkëpunimi me Prokurorinë e Përgjithshme dhe Prokuroritë e tjera, ligji i ka të ndara kompetencat dhe nga pikëpamja ligjore është e qartë, ka qenë shumë i mirë si bashkëpunim, nuk ka asnjë problematikë. Nga 746 persona nën hetim, 515 prej tyre janë hetuar me masa sigurimi, ndërsa 231 persona janë hetuar në gjendje të lirë.
Nga personat e hetuar me masa sigurimi, 288 prej tyre janë hetuar me masën arrest me burg, nga të 257 janë ekzekutuar ndërsa për 31 persona është vendosur masa e sigurisë arrest në mungesë. Masa e sigurisë arrest me burg për 198 persona është vendosur për veprat penale që lidhen me krimin e organizuar. Për përgjimet, në dhjetor të 2019 është vendosur një ambient i veçantë për kryerjen e tyre, janë të izoluara, të sigurta ku janë 7 poste, ku oficerët kanë kryer punën. 91 për qind e procedimeve penale është kryer me metodën e përgjimeve nga 10 oficerë, për këtë arsye ngarkesa ka qenë e madhe. Mbi 1000 subjekte të përgjuara, pjesa më e madhe për korrupsion. Zyra e Përgjimeve është në gjendje pune, me kapacitet të plotë. Ne kemi bashkëpunuar ndërkombëtarisht, siç parashikon ligji.
Në SPAK janë trajtuar 69 kërkesa nga vendet e tjera, 20 prej të cilave kanë qenë të mbartura nga Krimet e Huaja. Numri i lartë i tyre tregon besimin e institucioneve ndërkombëtare te SPAK. Kemi bashkëpunuar edhe me antimafien dhe antikrimin në Itali, si dhe autoritetet në Kroaci. Veprat penale të hetuara bashkë me të huajt kanë qenë ato për trafik të lëndëve narkotike dhe grup i strukturuar kriminal. Janë kryer gjithsej edhe 43 ekstradime me shtete të huaja”, tha Kraja.
Edhe në kuadër të OFL-së, SPAK ka mbrojtur para Gjykatës kërkesat për sekuestrim pasurie, ku janë pranuar 115 kërkesa të SPAK në gjykatë për sekuestrim pasurie.
“Nga 120 kërkesa për sekuestrim pasurie, 115 janë pranuar. Janë mbi 200 pasuri të paluajtshme të sekuestruara. Është vepruar edhe në kuadër të ligjit antimafia, ku janë kryer po ashtu sekuestrim pasurie. Goditja e pasurisë kriminale ka qenë shumë e efektshme dhe në një periudhë tepër të shkurtër.
Janë dënuar 50 persona pas kërkesës së SPAK. Kemi punuar edhe në drejtim të vendosjes të disa të burgosurve në një regjim të posaçëm. E rëndësishme është që procesi ka qenë ligjor dhe është në monitorim të vazhdueshëm e ka funksionuar. U zgjodh drejtori i BKH-së, me një proces të rregullt e demokratik. Kemi punuar në asistencë me autoritetet e huaja, europiane dhe ato amerikane. Kemi pasur asistencë edhe nga EURALIUS.
Përfaqësuesit e SPAK kanë raportuar edhe në Ministrinë e Drejtësisë, edhe raportin e GREKOS-s. Kemi bërë një punë kolosale dhe jemi përpjekur të bëjmë më të mirën”, u shpreh Kraja.
/b.h
