Nuk kalon vetingun kreu i Prokurorisë së Apelit të Durrësit, Ferdinand Elezi. KPK, perbere nga trupi gjykues me Firdes Shuli, Lulzim Hamitaj dhe Olsi Komici ka vendosur sot shkarkimi e tij nga detyra.
Elezi shfaqi probleme me pasurinë për shkak të blerjes të dy apartamenteve dhe mospagimit të taksës për fitimin nga qiraja e apartamentit në tiranë pranë Komunës së Parisit.
Elezi ishte shprehur se pasurinë e ka vënë me punë ndërsa taksën për të ardhurat nga qiraja nuk e dinte se duhet t’i paguante dhe sapo është njohur me këtë fakt i ka paguar.
Ferdinand Elezi është diplomuar jurist në fakultetin e Drejtësisë në Tiranë në vitin 1996. Ai ka kryer gjithashtu Master të Nivelit të Dytë si dhe ka përfunduar studimet Doktorale në Fakultetin e Drejtësisë në vitin 2012.
Elezi e ka filluar karrierën në Prokurorinë e Kavajës në vitin 1999, ndërsa gjatë viteve 2003-2005 ka drejtuar Prokurorinë e Rrethit Durrës. Në vitin 2005 ai është emëruar drejtues i Prokurorisë së Apelit të Tiranës, detyrë të cilën e ka kryer deri në vitin 2006.
Përgjatë viteve 2006-2013, Elezi ka kryer detyrën e prokurorit në Prokurorinë e Apelit të Durrësit. Prej vitit 2013 ai mban postin e Drejtuesit të Prokurorisë së Apelit Durrës.
Ferdinand Elezi ishte një ndër kandidaturat e garës për Prokurorin e Përgjithshëm të Përkohshëm, e cila u mbyll me zgjedhjen e Arta Markut në dhjetor të vitit 2017.
Analiza e pasurisë është një ndër tre shtyllat e rivlerësimit për prokurorët, së bashku me kontrollin e figurës dhe vlerësimin e aftësive profesionale.
Ditën e sotme KPK-ja dogji edhe kreun e Apelit të Krimve të Rënda, gjyqtarin Fehmi Petku për shkak të problemeve me pasurinë.
g.kosovari
