Kreu i Partisë Demokratike në Gjirokastër Roland Bejko, ka ironizuar aksionin që po bëhet në Lazarat dhe zbarkimin e forcave speciale të policisë në fshatin rebel.
Përmes një postimi në Facebook, Bejko ironizon faktin se me zhdukjen e Lazaratit, Shqipëria do të shpëtonte nga të gjitha veset e këqija.
Postimi i plotë
“Nëse nuk do ekzistonin mediat, gazetat, TV, rrjetet sociale etj, kam përshtypjen se nuk do kishte fare kontrolle nëpër shtëpitë e të gjithë banorëve! Pa media, nuk ka spektakël. Kontrolli i këtyre shtëpive është si puna e asaj fabulës që një polici i ra gjilpëra në një vend të erët, por ai, polici, e kërkonte atë, gjilpërën në vendin ku ndriçonte llampa e shtyllës së rrugicës pranë dhe kur dikush e pyeti çfarë po kërkon këtu:
-Më ka humbur një gjilpërë, iu përgjigj polici.
-Ku, e pyeti kalimtari.
-Më ka rënë aty pak më tej, por po e kërkoj këtu se këtu ka dritë…!
Telenovela ‘100 vitrinat’ në Lazarat vazhdon! Veçse regjisori dhe skenaristi kishin parashikuar që seria e djeshme të kishte gjak. Kështu telenovela bëhej më interesante!
A nuk janë të gjithë para ekranit dhe FCB duke shfryrë në anonimitet gjithë ligësinë, mallkimet, urrrrrrejtjen dhe rrrrrracizmin e tyre të pështirë ndaj gjithkujt e gjithçkaje që është dhe ka të bëjë me Lazaratin?!
Tani gjithë imoralët, hajdutët, trafikantët dhe kriminelët me kollare kanë dalë e na flasin për nder! Po mbulojnë m…. me sh….!
Për fat të keq, anë e kënd vendit janë vrarë në mënyrë kriminale mijëra policë, por nuk kam asnjë rast ku të ketë një urrejtje, reprezalje e mallkime deri në zhdukje kolektive, thirrje për djegie me napalm, apo ulërima për hedhje të një bombe atomike mbi të tërë popullsinë e Lazaratit dhe kështu a thua do të shpëtojë gjithë Shqipëria nga e keqja e madhe: nga vjedhja e Bankës Qendrore, nga korrupsioni me tenderat publike, nga trafiku i ilaçeve, nga kokaina dhe heroina, nga trafiku i qenieve njerëzore rrugëve të botës, nga vjedhjet e shtëpive a vrasjet e njerëzve në Itali, Greqi e gjetkë, nga evazioni fiskal në tatime e dogana…, pra do shpëtojmë nga të gjitha krimet që bën ai “popull i poshtër” i Lazaratit!
Po u zhduk populli i Lazaratit, Shqipëria do shpëtojë nga veset dhe horrllëqet. Madje nuk do ketë më as se kush t’ia nxijë faqen Shqipërisë dhe shqiptarëve para botës, dhe jashtë nuk do na vijë më turp që jemi shqiptarë! U prefsh në paqe Ibrahim Basha, dheu të qoftë i lehtë!
Ti Ibrahim u bëre viktimë e krimit, padyshim, dhe ike nga kjo jetë në moshën më të bukur, por ti ishe viktimë edhe e atyre që e mbajnë gjallë krimin me ligësinë e tyre apo me paaftësinë e tyre për shkak të urrejtjes gati shekullore ndaj një popullisie të tërë si ajo e Lazaratit, që në vend t’i japin paqe atij populli për një vit të tërë, i çojnë blinda, i plasin buzën, i nxijnë jetën, e për pasojë krijojnë njeriun e ri, njeriun kriminel.
(Uroj sinqerisht të mos ketë viktima të tjera! Zoti i mbroftë policët dhe banorët e pafajshëm)”, shkruan ai.
