Kreu i Inspektoriatit të deklarimit të Pasurisë Shkëlqim Ganaj ka prezantuar sot në komisionin parlamentar të ligjeve raportin vjetor të institucionit, ku ka ngritur shqetësimin se pavarësisht se në prokurori janë dërguar për shqyrtim 84 zyrtarë, organi akuzës nuk ka vepruar. Ganaj tha se ndër 84 zyrtarët, 10 janë gjyqtarë dhe sipas tij, asnjëri prej tyre nuk është shkarkuar.
“Për gjyqtarët kemi kërkuar të merren masa administrative. Deri më tani asnjë gjyqtar nuk është shkarkuar.”, tha Ganaj.
Sakaq, Ganaj pohoi se 10 raste rezultojnë me 40 milionë euro të pajustifikuara. “Për këto 10 raste kemi këmbëngulur, dhe s’kemi marrë përgjigje”, tha ai.
Ndërkohë, deputeti i majtë, Alfred Peza pyeti Ganajn nëse kishin bërë ankim për moszbatimin e afateve kohore. Ganaj tha se “Kemi reaguar që në 2014, arsyetimet janë skandaloze”.
