Komisioni për Edukimin dhe Mjetet e Informimit Publik, në drejtimin e nënkryetares Mirela Kumbaro në mbledhjen virtuale të radhës zhvilloi seancë dëgjimore me katër kandidaturat për kryetar të Autoritetit të Mediave Audiovizive (AMA), ku përzgjodhën dy prej tyre.
Kandidatët Alketë Dibra, Armela Krasniqi, Elvis Gjergji dhe Ermela Guxholli prezantuan dhe shpalosën platformën e tyre para deputetëve të komisionit, si dhe vizionin për drejtimin e një institucioni të rëndësishëm siç është AMA.
Anëtarët e këtij komisioni pas një seance dëgjese me pyetje dhe përgjigje drejtuar kandidatëve u tërhoqën në një mbledhje me dyer të mbyllura ku përzgjodhën mes kandidatëve dy prej tyre: Armela Krasniqi dhe Alketë Dibra, të cilat do t’i përcillen për shqyrtim seancës së ardhshme plenare.
Mbledhja e sotme e komisionit u zhvillua përmes platformës virtuale të komunikimit “Cisco Webex”.
/a.r
