Kremlini dënoi sot amatorizmin që ka të bëjë me akuzat për pirateri bërë nga SHBA-ja, shërbimet sekrete të të cilës akuzojnë Moskën për sulme informatike destinuar për të influencuar fushatën zgjedhore amerikane.
“Bëhet fjalë për akuza krejtësisht të pabaza, të një niveli amator”, deklaroi zëdhënësi i Kremlinit, Dmitri Peskov.
“Këto akuza kanë filluar të na lodhin”, shtoi ai duke përmendur një “gjueti të vërtetë shtrigash”, shprehje e përdorur tashmë nga presidenti i zgjedhur amerikan, Donald Trump, i cili mendon se kjo “gjueti shtrigash politike” ka si qëllim ta dobësojë.
Shërbimet sekrete amerikane publikuan javën e kaluar një raport ku theksojnë se një fushatë ruse piratimi është zbatuar me qëllim për të cënuar procesin demokratik amerikan dhe për të rritur mundësitë për fitoren e miliarderit republikan, Donald Trump duke denigruar rivalen demokrate, Hillary Clinton.
“Ne vazhdojmë të përgënjeshtrojmë çdo ndërhyrje të Moskës në sulmet informatike kundër SHBA-së”, deklaroi Peskov.
“Ne nuk dimë se çfarë të dhënash janë përdorur nga ata që bëjnë akuza të tilla të pabaza”, nënvizoi ai./a.m.
