Duke komentuar deklaratën e presidentit Aleksandër Vuçiç, i cili tha se vendimi i Rusisë për të paguar gazin në Rubla do të krijonte shumë probleme të reja për Serbinë, zëdhënësi i Kremlinit Dmitry Peskov tha se shqetësimet e Serbisë do të jenë prioritet për Rusinë.
Peskov tha se Moska e kupton qëndrimin e presidentit të Serbisë ndryshe nga një shtet si Bullgaria që ka ndërmarrë hapa armiqësorë ndaj Rusisë, prandaj shtete të tilla do të duhet që ta paguajë gazin në Rubla, duan apo jo, dëshirojnë ose jo.
Në të njëjtën kohë sipas Peskov kjo nuk vlen për Serbinë që do të paguajë në Euro.
Presidenti rus Vladimir Putin ka vendosur që të ashtuquajturat “vendet armike” të paguajnë gazin në Rubla në të ardhmen çka ka rritur me të paktën 25% vlerën e tij në treg.
Sipas Putin nuk ka kuptim që Rusia të furnizojë me produktet e saj BE- në dhe SHBA- në dhe të marrë pagesa në Dollarë, Euro dhe monedha të tjera. Presidenti rus urdhëroi kompaninë “Gazprom” që t’i transferojë kontratat në Rubla.
Ai tha se Rusia do të vazhdojë të furnizojë gaz në përputhje me sasitë dhe çmimet e dakorduara por në monedhën kombëtare ruse.
Presidenti i Serbisë, Aleksandar Vuçiç, kishte thënë se rritja e çmimit të naftës dhe gazit, si pasojë e vendimit të Putinit për të paguar gazin në Rubla, është një problem i madh për të gjithë botën.
/a.r
