Pasi Gjergji Nika nuk u regjistrua nga ana e Komisionit Qendror të Zgjedhjeve si kandidat i pavarur në zgjedhjet e pjesshme për bashkinë e Vlorës, ai e ka dërguar çështjen në Gjykatën Administrative të Apelit, ku sot do të hidhet shorti për përcaktimin e trupit gjykues të Kolegjit Zgjedhor Gjyqësor.
Kolegji Zgjedhor Gjyqësor do të marrë në shqyrtimin padinë e kryer nga Gjergji Nika, i cili kërkon ndryshimin e vendimit të Komisionerit Shtetëror të Zgjedhjeve dhe që KQZ-ja ta regjistrojë atë si kandidat për Bashkinë e Vlorës në zgjedhjet e pjesshme të 9 nëntorit.
“Ndryshimin e vendimit të Komisionerit Shtetëror të Zgjedhjeve nr.1437, datë 26.10.2025 duke vendosur: “Regjistrimin e Z.Gjergji Nikë Nika, si kandidat për Kryetar Bashkie, i propozuar nga zgjedhësit, në zonën zgjedhore Bashkia Vlorë, në zgjedhjet e pjesshme vendore për Kryetar Bashkie, për disa njësi të qeverisjes vendore të datës 9 nëntor 2025”, thuhet në objektin e padisë të kryer nga Gjergji Nika ndaj KQZ-së dhe të depozituar në Gjykatën Administrative të Apelit.
Dy ditë më parë, Nika ishte i pranishëm në Komisionin Qendror të Zgjedhjeve, ku iu bë e ditur nga kreu i këtij institucioni Ilirjan Celibashi se ai mund të afirmohej si kandidat i mbështetur nga zgjedhësit vetëm duke përgatitur një kërkesë te komisioni Nismëtar.
“Ju kishit detyrimin që të afirmoheshit si kandidat i mbështetur nga zgjedhësit vetëm duke përgatiur këtë kërkesë tek një Komitet Nismëtar. Favori që ligji iu ka bërë është që ju nuk kishit nevojë për të mbledhur firma”, tha Celibashi.
Nga ana e tij, Nika u përgjigj se “në radhë të parë mua ma lejon ligji, pasi ti e ke të shprehur shumë të qartë, neni 70 pika 4, shkruhet, kandidatët që janë kryetarët e Bashkive, anëtarët e Këshillit Bashkiak dhe deputetët. Me një vërtetim nga instucionet e tyre, mund të regjistrohen duke mbajtur një mandat mbi gjashtë muaj” .
Në zgjedhjet e pjesshme vendore të 9 nëntorit gara për kreun e bashkisë së këtij qyteti do të zhvillohet mes mes 2 rivalëve; Bruna Mersinit dhe të pavarurit të mbështetur nga opozita, Dionis Sota, ndërsa tashmë pritet se cili do të jetë edhe vendimi që do të marrë Kolegji Zgjedhor për Gjergji Nikën nëse ky i fundit do të bëhet pjesë e garës për bashkinë e Vlorës.
