Komisioni Qendror i Zgjedhjeve ka shqyrtuar kërkesën e Partisë Demokratike për çregjistrimin e kandidatit për kryetar të Bashkisë Këlcyrë, Gentian Muhameti, i cili rezulton me të shkuar kriminale.
Në mbledhjen e saj KQZ ka vendosur që kërkesën e PD-së të ia adresojë institucioneve përkatese për të marrë informacion më të thellë dhe më të saktë për kandidatin Muhameti, duke e lënë ende në garë atë.
Përfaqësuesit e majtë kanë kërkuar dokumente që të tregojnë arsyen e kërkesës për çregjistrim duke qenë se ligji nuk i parashikon këto raste. Ndërsa nga ana e tyre, të djathtët kanë qenë pro çregjistrimit, duke e quajtur një akt në favor të një çështjeje madhore siç është dekriminalizimi. Megjithatë ata kanë pranuar boshllëkun ligjor në lidhje me këto raste.
Vetë përfaqësuesi ligjor i kandidatit Gentian Muhameti ka deklaruar se ndaj tij nuk ka vendim gjykate të formës së prerë dhe theksoi se kërkesa e PDsë është e pabazuar në ligj dhe prova.
Pak ditë më parë Partia Demokratike vendosi të tërheqë nga gara elektorale e 21 qershorit kandidatin e saj për Këlcyrën, Gentian Muhameti, për shkak të dyshimeve për të kaluarën e tij.
