Komisioni i Pavarur i Kualifikimit ka vendosur shtyrjen e vendimit për gjyqtaren e Gjykatës Kushtetuese Altina Xhoxhaj.
Në seancën e djeshme u zhvillua një debat i tensionuar mes anëtarëve të KPK dhe Xhoxhajt, e cila sipas organeve të Vettingut posedonte pasuri që nuk i justifikonte.
Raportohet se Xhoxhaj ka paraqitur dokumente shtesë pas seancës së djeshme dhe në këto kushte KPK ka vendosur të shtyjë dhënien e vendimit për në datën 3 Maj.
Kjo është hera e parë që KPK vendos të shtyjë vendimin, duke kërkuar më shumë kohë.
Konstatimet e KPK:
“Xhoxhaj ka apartament banimi 101 m2 në rrugën ‘Reshi Petrela’, blerë 61 mijë e 50 euro. Ka truall me sipërfaqe 221.9 m2, blerë në vitin 2013 në Gjirin e Lalzit, si dhe apartament 2+1 plus verandë po në Gjirin e Lalzit.
Xhoxhaj ka disa llogari kursimi së bashku me bashkëjetuesin. Asaj i është kërkuar shpjegim për këtë pasuri. Gjyqtarja nuk i ka sjellë disa dokumente në kohë. Xhoxhaj sot ka barrën e provës për të provuar burimin e pasurisë për apartamentin me sipërfaqe 101 m2. Ajo ka bërë deklarime të pavërteta.
Janë afër 4.4 milionë lekë për të cilat nuk ka justifikim në dokumentacion. Kemi informacione konfidenciale. Apartamentin 2+1 në Gjirin e Lalzit ka rezultuar se nuk e ka blerë me para të ligjshme dhe nuk justifikohet. Në truallin me sipërfaqe 221.9 m2 Xhoxhaj ka përfituar 100 m2 më tepër nga çfarë i takonte.
Kemi verifikuar edhe TIM-s për këtë gjyqtare, burimin e pagave dhe rezulton se Xhoxhaj nuk i justifikon të ardhurat. Edhe bashkëjetuesi i gjyqtares mban para cash tej kufirit të lejuar me ligj. Në vitet 2003-2004 Xhoxhaj ka bërë deklarime të pasakta. Xhoxhaj ka arsyetuar vendime me vonesë edhe pse nuk ka pasur ngarkesë në punë, ka vonuar gjykime. Shtetasi B. C. ka sjellë denoncim për gjyqtaren për vendimin e vitit 2016, ku Xhoxhaj ka qenë anëtare”./a.m.
