Këtë të premte u mbajt në Komisionin e Pavarur të Kualifikimit seanca dëgjimore e vettingut për Kryetarin e Gjykatës së lartë, Xhezair Zaganjori, i cili dëgjoi relacionin e KPK-së dhe dha sqarimet e tij për të gjitha gjetjet.
Në dalje të sallës, Zaganjori bëri një prononcim të shkurtër edhe për mediat e pranishme, duke theksuar se ka dokumentuar dhe sqaruar çdo çështje para gjyqtarëve të Komisionit të Pavarur të Kualifikimit.
“Nuk është momenti për intervista. Jam njeri i ligjit, dhe erdha në proces. E kam mbështetur reformën në Drejtësi, ndaj kam respektuar KPK dhe kam dokumentuar gjithçka. Kam 40 vite pune dhe kam punuar me përkushtim”, tha ai.
Teksa u pyet për faktin nëse kishte besim tek sistemi i drejtësisë, ai u shpreh se: “Nuk e di, atë do ta shohim, pasi të gjithë dokumentet qe kam pasur më është dashur që të shkoj në Gjermani”.
Kreu i Gjykatës së Lartë u paraqit i vetëm në seancën dëgjimore, duke mos zgjedhur të mbrohet me avokat, ndërsa KPK-ja raportoi disa mospërputhje në disa nga deklaratat e tij të pasurisë.
Kështu sipas KPK-së ka probleme në deklarimin e një apartamente rreth 293 metra katrorë në pronësi të Zaganjorit, por edhe në deklaratën e shpenzimeve për arsimimin jashtë shtetit të fëmijëve të tij./a.m.
