Komisioneri Publik ankimon vendimin e KPK për konfirmimin në detyrë të Artan Madani, magjistrat/prokuror, Drejtues në Prokurorinë pranë Gjykatës së Shkallës së Parë, Kavajë.
Edhe pse Madani kaloi me sukses Vettingun, dhe KPK e rikonfirmoi në detyrë më 1 korrik të këtij viti, Komisioneri Publik ka kërkuar shkarkimin e Madanit. Sipas KPK Madani rezultoi i pastër në të treja shtyllat e vlerësimit por sipas Komisionerit Publik Artan Madani, nuk plotëson kushtet për konfirmimin në detyrë.
“Komisioneri Publik, pasi shqyrtoi vendimin e Komisionit të Pavarur të Kualifikimit, si dhe mori në konsideratë rekomandimin e paraqitur nga Operacioni Ndërkombëtar i Monitorimit për të paraqitur ankim, vlerëson se, bazuar në provat dhe faktet e administruara nga Komisioni i Pavarur i Kualifikimit, subjekti i rivlerësimit, z. Artan Madani, nuk plotëson kushtet për konfirmimin në detyrë” thuhet në njoftimin e Komisionerit publik.
Nëpërmjet këtij ankimi, Komisioneri Publik kërkon nga Kolegji i Posaçëm i Apelimit të marrë në shqyrtim çështjen në seancë publike dhe, në përfundim të gjykimit, të ndryshojë vendimin nr. 173, datë 1.7.2019, të Komisionit të Pavarur të Kualifikimit, duke vendosur shkarkimin nga detyra të subjektit të rivlerësimit, z. Artan Madani.
Artan Madani e ka nisur karrierën në sistemin e drejtësisë në vitin 1994.Ai ka punuar si prokuror në Durrës, ka drejtuar prokurorinë e Lezhës dhe është rikthyer sërish si prokuror në Prokurorinë e Durrësit. Në vitin 2014, Madani është emëruar në Prokurorinë e Kavajës ku është promovuar më pas si drejtues i kësaj prokurorie.
g.kosovari
