Ish-administratori i OKB-së për Kosovën pas çlirimit saj, Bernard Kouchner, do të nderohet me Honoris Causa nga Universiteti Evropian i Tiranës me rastin e 10-vjetorit të krijimit.
Titulli akordohet ditën e martë, 20 shtator, ku Kouchner është i ftuar të mbajë një fjalim përshëndetës, shkruan Koha Ditore.
Motivimi i nderimit të tij me titullin më të lartë akademik mban parasysh tre faktorë; 1. Kontributin e tij të shquar si përfaqësues i OKB-së në Kosovë, si mbështetës i krijimit të institucioneve ligjore, ekonomike e sociale të Kosovës dhe mbrojtjes së kauzës se pavarësisë së saj; 2. Si reformator, për qëndrimin e tij përtej politikës tradicionale e majtë, e djathtë, kur është çështja për interesa më të larta dhe 3. Duke qenë se ishte mjek dhe ishte një nga themeluesit e organizatës “Mjekët pa kufi” dhe iniciator i një parimi të rëndësishëm në kuader të OKB-së për rastet e ndërhyrjeve humanitare në vende ku kishte kriza.
Diplomati francez është një prej avokatëve më të rëndësishëm të çështjes shqiptare dhe të shqiptarëve në Evropë.
Një nga figurat me rëndësi në politikën franceze, që ka shërbyer si ministër i Jashtëm dhe i Shëndetësisë me të majtën dhe me të djathtën, Bernard Kouchner, për shqiptarët është bërë pjesë e kujtesës për shkak të detyrës së tij si administrator i OKB-së për Kosovën direkt pas shpalljes së Pavarësisë.
Një mbrojtës i pavarësisë së Kosovës, ai më pas u bë një avokat i saj dhe në debate publike, duke hedhur poshtë akuzat që iu bënë UÇK-së për trafik organesh. Kouchner gjatë qëndrimit në Tiranë do të takohet edhe me kryeministrin e Shqipërisë, Edi Rama, pasditen e së hënës. (b.an)
