Këshilli i Ministrave miratoi sot paketën e plotë të ndryshimeve kushtetuese, në kuadër të reformës në drejtësi, bashkë me financimin e plotë që shkon në 1.8 miliardë lekë.
Ministri i Financave, Arben Ahmetaj bëri të ditur kostoja financiare prej 1.8 miliardë lekësh përfshin të gjitha elementët që duhen përmirësuar në sistemin e drejtësisë shqiptare.
“Paketa ka të bëjë me rritjen e pagave, rritjen e numrit të punonjësve dhe koston e ngritjes së institucioneve të reja që janë referuar në të gjithë paketën kushtetuese të reformës në drejtësi. Sot qeveria kaloi financimin e plotë të reformës në drejtësi”, deklaroi Ahmetaj.
Nga ana tjetër numri një i Financave pohoi se klima e biznesit në vend është përmirësuar. Teksa u ndal tek raporti i publikuar i ‘Forumit Ekonomik Botëror’, Ahmetaj tha se shifrat tregonin se Shqipëria është përmirësuar me 17 pozicione në renditjen globale.
“Tashmë nuk është më një shenjë politike, por realitet kur sipërmarrësit dhe qytetarët pranojnë edhe për shkak të ndjesisë së tyre të përditshme se klimës e biznesit është përmirësuar. Për ta ilustruar kam sjell edhe indeksin e tregtisë me pakicë. Kjo është një statistikë e rëndësishme. Në tre-mujorin e dytë të 2016-ën indeksi është rritur 6.2 për qind. Një rritje e konsiderueshme që vlen të përmendet”, tha Ahmetaj.
BW/d.i.
