Ka përfunduar takimi i mbajtur midis përfaqësueseve të pozitës dhe opozitës në lidhje me çështjen e marrëveshjes të shënimit të vijës kufitare me Malin e Zi. Burime nga takimi të Gazetës Express bëjnë të ditur se në mbledhje është formuluar një deklaratë që më pas do ju dërgohet liderëve.
Ideja e kësaj deklarate është që të nxitet dialogu i brendshëm politik. Burime për Express thanë se kjo deklaratë parimisht është pranuar nga të gjitha palët dhe vetëm Lëvizja Vetëvendosje ka patur rezerva.
“Në frymën e dialogut të brendshëm politik dhe me qëllim të ruajtjes dhe konsolidimit të stabilitetit në vend, avancimit të reformave shtetndërtuese dhe integrimeve euroatlantike dhe ruajtjes e kultivimit të marrëdhënieve me të gjithë partnerët rajonal e ndërkombëtarë; Udhëheqësit e subjekteve politike parlamentare , Partia Demokratike e Kosovës (PDK), Lidhja Demokratike e Kosovës (LDK), Lëvizja Vetëvendosje, Aleanca për Ardhmërinë e Kosovës (AAK) dhe Nisma për Kosovën (NISMA), zotohen se do të punojnë së bashku”, thuhet në një pjesë të kesaj deklarate që ka siguruar Gazeta Express.
Takimi është realizuar me iniciativën e Naim Rashitit nga Grupi Ballkanik, i cili ishte i vetmi që u prononcua për media pas takimit. Ndonëse ky takim nuk u zhvillua në nivel liderësh, pjesë e tij ishin nga PDK-ja Xhavit Haliti e Elmi Reçica, nga LDK-ja Arban Abrashi e Faton Avdullahu, nga VV-ja Aida Dërguti e Driton Çaushi, nga AAK-ja Muharrem Nitaj e Ardian Gjini, si dhe nga Nisma për Kosovën Jakup Krasniqi e Bilall Sherifi.
