Mirë që do vinë në Shqipëri, por çfarë fitojnë. Llogaritjet thonë pothuaj asgjë.Në klubin e futbollit Ferronikeli vazhdojnë të besojnë se ndeshjen e fazës së parë kualifikuese për Ligën e Kampionëve, do ta zhvillojnë në stadiumin “Adem Jashari” në Mitrovicë, shkruan “Koha Ditore”.
Nëse ky stadium nuk do të jetë gati deri në fund të qershorit, atëherë skuadra nga Drenasi do të luajë në Elbasan ndeshjen si vendase, por humbjet nga kjo dalje jashtë kufijve, do të ishin të mëdha, vlerësojnë zyrtarë të klubit kampion. Në fakt, humbjet do të ishin të shumëfishta.
Në radhë të parë, do të humbiste klubi, që s’do të mbledhë parat nga biletat, krahasuar me ato që do të merrte nëse ndeshja të luhej në Kosovë.
Po ashtu, kostoja e shfrytëzimit të stadiumit të Elbasanit do të ishte shumë më e lartë se e shfrytëzimit të një stadiumi në Kosovë, pasi do të humbnin tifozët e Kosovës që do t’ia mësynin Elbasanin, do të humbnin bizneset, në këtë rast të Mitrovicës me mosorganizim të ndeshjes në “Adem Jashari” dhe në fund, vetë futbolli i Kosovës, për të cilin do të jetë kjo ndeshja e parë zyrtare pas pranimit në UEFA dhe FIFA. (b.an)
