Ka reaguar edhe familja e Isa Boletinit mbi varrosjen e tij në Vlorë. Gazmend Boletini thotë se populli i Boletinit i do eshtrat e tij aty, ndaj dhe do kërkojnë rivarrosjen nga Vlora në Boletin.
Pas vendimit që Isa Boletini të rivarroset në Vlorë, në Mitrovicë u mbajt së fundmi një tubim, ku kërkohet që eshtrat e heroit kosovar të mbeten në fshatin e tij të lindjes. Kryetari i Komunes, Agim Bahtiri, historianë e përfaqësues të organizatave, si dhe familjarë të heroit ishin në një tubim, ku u theksua se nuk do të lejohet që gjenerali Isa Boletini të dërgohet në Vlorë. Në emër të Lidhjes së Historianëve, Enis Kelmendi, tha se “nuk kemi asgjë kundër Vlorës, por Isa duhet të prehet aty ku lindi, u rrit dhe ku mbrojti çështjen shqiptare”.
Ne takim kane folur edhe analisti Nexhmendin Spahiu, kusheriri i Boletinit Riza Peci, prof. Asllan Istrefi, etj. Tjetër reagim ka ardhur nga ish presidenti Fatmir Sejdiu, që tha se eshtrat e I. Boletinit duhet të varrosen në Kosovën e lirë dhe institucionet e Kosovës duhet të korrigjojnë vendimin dhe të mos i dërgojnë eshtrat e Boletinit në Vlorë.
Ka reaguar edhe kryetari i Aleancës për Ardhmërinë e Kosovës Ramush Haradinaj në Facebook, ku shkruan se “Kulla e Isa Boletinit në Boletin të Mitrovicës i ka rezistuar të gjitha stuhive të vështira nëpër të cilat ka kaluar kombi ynë. Ajo nuk është vetëm kullë. Kulla e Boletinit është simbol i luftës tonë kundër tkurrjes së trojeve tona. Eshtrat e Isa Boletinit janë pjesë e rëndësishme e testamentit që ruan kjo kullë ndër breza dhe aty duhet të rivarrosen”, shkruan Haradinaj.
