Brukselit zyrtar do t’i prezantohet nga pala kosovare kërkesa që Gjykata Speciale të mos jetë puro ndërkombëtare dhe që të kufizohet juridiksioni kohor i këtij mekanizmi, i cili do të trajtojë krimet që pretendohet t’i ketë kryer UÇK-ja, shkruan Koha Ditore. Autoritetet kosovare duan përfshirje të gjyqtarëve vendës në të.
Për këtë, Ekipi Teknik, i drejtuar nga ministri Hajredin Kuçi, ia ka përcjellë një raport pune dhe një propozim Grupit Politik, në përbërje të të cilit janë presidentja Atifete Jahjaga, kryeparlamentari Kadri Veseli, kryeministri Isa Mustafa dhe ministri i Jashtëm, Hashim Thaçi.
