Kandidati për Kryetar Bashkie në Tiranë, Halim Kosova, prezantoi sot para banorëve të njësisë 8 programin e tij dhe u shpjegoi se si do ndikojë në përmirësimin e jetës së tyre. Kosova u ndal tek projektet e detajuara, dhe theksoi edhe një herë parimet e tij të qeverisjes që janë përkushtimi, transparenca dhe lufta ndaj korrupsionit.
“Unë kam gjithashtu projekte specifike dhe konkrete jo vetëm për njësitë dhe komunat por për çdo lagje, pikërisht aty ku ju banoni. Sot unë dua të ndaj me ju projektet që kam për ju, rikonstruksionin e infrastrukturës rrugore të bllokut që kufizohet nga rruga “Siri Kodra” – rruga “Dibrës” – “Ibrahim Buzhiqi” dhe “Ferit Xhajko”. Blloku ka sipërfaqe prej rreth 18 ha”, theksoi Kosova.
Pjesë e investimeve të Bashkisë së Tiranë, tha Halimi, gjatë viteve 2012 – 2013 ka qenë rikonstruksioni i 2 rrugëve në këtë bllok, përkatësisht rrugët “Gjon Buzuku” dhe “Ibrahim Buzhiqi”. Projekti parashikon ndërhyrjen në rrjetin rrugor me gjatësi rreth 3 km, ndërtimin e trotuareve me sipërfaqe rreth 840 m2, ndërtimin e rrjeteve inxhinjerike, vendosjen e rreth 100 ndriçuesve, krijimin e këndeve shplodhëse për fëmijë dhe të rritur në rrugën “Besim Daja”, rrugën “Hysen Hasan Huqi”, rrugën “Islam Petrela”, krijimin e rreth 500m2 sipërfaqe të gjelbërta, në rrugën “Besim Daja”, në rrugën “Hysen Hasan Huqi”, mbjelljen e 46 pemëve si dhe vendojesjn e sinjalistikës horizontale dhe vertikale.
Ndërkohë, sipas kandidatit demokrat, investimet për vitet 2015 – 2017 për të gjithë njësinë janë në 10 objekte me vlerë 1,614,598,992 lekë e do të përqëndrohen në përmirësimin e higjenës, përmirësimin e infrastrukturës së arsimit parashkollor dhe parauniversitar, e infrastrukturën rrugore.
“Unë nuk jam një politikan tipik, por ndoshta për këtë keni nevojë. Pikërisht pse kam projekte specifike për lagjen tuaj dhe për çdo lagje të Tiranës do t’ju them ekzaksisht se çfarë do të bëj. Në vend që unë të fajësoj të tjerët, gjithë jetën time kam marr përgjegjësi për të zgjidhur problemet. Unë jam një menaxher i fortë, me vizion të qartë, vendos objektiva dhe arrij standardet. Çdo projekt do të përfundohet brenda afatit kohor dhe do të tregoj tolerancë zero ndaj korrupsionit ashtu siç kam bërë gjatë gjithë jetës sime. Unë do të punoj për të gjithë dhe me të gjithë ju pa asnjë dallim”, iu drejtua Halimi banorëve të njësisë 8, në Tiranë
