Në një intervistë për televizionin “Rusia 24”, presidenti i Serbisë Aleksandër Vuçiç akuzoi Kosovën se e pengon të njohë Krimenë si pjesë të Rusisë.
Beogradi nuk mund të njohë Krimenë si pjesë të Rusisë pasi automatikisht vendet perëndimore do të ngrinin pretendime për Kosovën. Në një intervistë për televizionin rus “Rusia 24”, presidenti i Serbisë Aleksandër Vuçiç deklaroi ndër të tjera se nëse vendi i tij njihte Krimenë atëherë do të rrezikohej zgjidhja e çështjes së statusit të Kosovës.
Sipas tij, njohja e Krimesë si pjesë e Rusisë do të mund të përdorej nga shtetet perëndimore si pretekst për t’ia marrë Serbisë të drejtat për Kosovën. Perëndimi do të theksonte se në pajtueshmëri me këtë parim, Kosova është e pavarur dhe se Serbia nuk ka të drejtë të luftojë për të, sqaroi ai.
Por kreu i shtetit serb këmbënguli se ky qëndrim nuk ka ndikuar aspak në marrëdhëniet mes Beogradit dhe Moskës. Vuçiç tha se çdo njeri normal në Rusi dhe në çdo vend tjetër e kupton këtë qëndrim.
Në prezantimin e intervistës me presidentin serb, gazetari rus ndër të tjera shprehet se provinca Autonome Serbe e Kosovës dhe Metohisë e shpalli pavarësinë në mënyrë të njëanshme në Shkurt të vitit 2008 dhe më shumë se 60 shtete, përfshirë Rusinë, Kinën, Indinë, Izraelin, Greqinë dhe Spanjën, e kundërshtojnë njohjen e saj.
/a.rada
