Dëshira e qytetarëve për të pasur një debat të mirëfilltë ndërmjet dy kandidatëve kryesorë për bashkinë e Tiranës, me sa duket do të mbetet vetëm një dëshirë. Kjo pasi edhe një herë tjetër kandidati i PD për Tiranën, Halim Kosova e ka refuzuar sërish ftesën e rivalit të tij Erion Veliaj, për të dalë në një debat publik.
Sipas Halimit, njerëzve iu kanë ardhur në majë të hundës debatet, dhe se sipas tij ky vend ka nevojë për punë dhe jo llafe.
“Ka dalë filani tha dhe të kërkon debat të hapur. Solla në mendje gjithë kandidatët, njëri ka kënduar nëpër dasma, se kam informacion dhe mirë debat, po mos më kërko të këndoj tek tjetri. Debatet i kanë ardhur në majë të hundës njerëzve, dhe të gjithë e kemi të qartë se ky vend nuk ka nevojë për debat për debate, ky vend ka nevojë për punë, punë e dinjitet”, tha Halimi gjatë një takimi të zhvilluar sot.
Kosova është shprehur se është njeriu i duhur për Tiranën, për ta bërë një qytet më të mirë për kryeqytetasit.
“Mbas pranimit nga ana ime për ta vënë emrin dhe gjithë përvojën time, ndershmërinë time, deri tek thinja e fundit e bardhë në kokën time në dispozicionin tuaj, unë juve ju kërkoj edhe njëherë votën më datën 21 qershor, ilaçin më të mirë për të gjithë. Të tregojmë së bashku se ky vend nuk është vend i mallkuar, por i ka mundësitë të gjitha të bëhet me një ilaç të vetëm, njeriu i duhur në vendin e duhur dhe me provat e duhura”, tha Kosova.
